No comments yet

Devan aplea sarkeacho ani suropaiecho monxak rochlo

Rochnar Devan aplea sarkeacho ani suropaiecho monxak kaim nasloleantlo rochlo. Aplea lagim monxan ekcharan jieunk Devachi ieuzonn zaun asli. Mon’xan Gorvan boron monxan Deva bhaxen zaunk sodlem ani Devacher chuk keli ani apli mogachi soirigot Deva lagim moddli ani Deva sorxilo pois ghelo ani denvcharacho gulam zalo. Hea gulamponnantlo mon’xak soddounk ani tunttleli soirigot portun novean bhandun haddunk Devacho sasnnik Sobd monxachea rupan sonvsarant ieunk toyar zalo. Sasnnik Devacho Sobd Povitr Atmeache podven Maim Marie udexim mon’xachea rupan 2021 vorsam adim sonvsarant ailo. Tachem nanv Jezu Krist – Taka mhunntat Immanuel, mhollear Amchea Sangata Dev. Sogllea vellar Monis zalolo Devacho Sobd, Jezu Kristan, amkam patkantlim soddounk ani portun amkam Bapachim bhurgim korunk koxtt sonsle ani khursar melo ani apunn tisrea disa meleleantlo jivont zalo ani sogllea vellar amchea sangata asa. Jivont zalolo Jezu zo Maim Marie udexim zolmolo, To dhor disa ani disantlean zaite pavtti amchea jivitant zolmun ieunk sodhta. Koxem ami Taka zolmun haddteleanv ani Maim Marie bhaxen dusreank ani soglea monxakullak diteleanv?

Jitlei pavtti ami dusream mon’xam sovem, konnui tim zaum, Devachem sarkem ani suropai sodun kaddun tankam manan lekhtanv, mogan vagoitanv, usko dakoitanv, gorjek pavtanv, somzotanv, bhokxitanv, xebaski ditanv, vaitt chalintlim bhair sorunk adhar ditanv, dusream pasot teag kortanv, Devachem utor xikoitanv, tea utra pormonnem cholunk ani Devachi khuxi korunk adhar ditanv, titlei pavtti ami Jezuk amchea jivitant zolmun haddtanv ani, Maim Marie bhaxen, Jezuk ami dusreank ditanv. Zoxem Jezun sanglam: “Hanv bhukel’lom ani tumi mhaka jevonn dilem, Hanv tanel’lom ani tumi mhaka pieunk dilem, Hanv vattsur koso ail’lom ani tumi mhaka bhiradd dilem, hanv vingllo aslom ani tumim Mhaka nesunk dilem; piddent aslom ani tumi mhoji khobor-mat ghetli, bonddkhonnint aslom ani tumi Mhaka bhett dili… Mhojea lhanam bhavam-bhoinnim modlea ekleak jem tumi kelem, tem tumi Mhaka kelem” (Mt 25:35-36.40)

Somia Jezu Kristan, amkam dakoilele vatten ami cholun, tacheam sarkem (image) gorjevontam sovem sodun kaddun bukhel’leank, tanel’leank, vattsureank, vinglleank, piddestank, bonddkonnint asleleank, onitik sampoddeleank, kallokant jieteleank uzvaddachi vatt dakhoun, ojeachea bharan chepleleamcho bhar unnem korun, onathank-vidvanak-eksureank pavun ani adar diun Jezuk amchea kallzamnim dhor disa zolmun haddunk ani Taka boream kornneam udexim dusreank diun Jezuchea zolmachi porob ek nove nodren hea vorsant ami somorombhum-ia ani amkam mevtat titleam-i mon’xank Jezuchi khuxalkai vanttum-ia.

Let us celebrate this Christmas 2017 with a difference. Let us walk the way our Lord Jesus Christ showed us. Let us discover His face and image in those who are  hungry, thirsty, strangers, naked, sick, in those in the prison, in those who suffer injustice, in those in darkness, in those with a heavy burden of life, in the orphans-widows-lonely and in all those who are going through tough times and reach out to them as we would reach out to Jesus Himself, for He said “truly I tell you, just as you did it to one of the least of my brothers, you did it to me”(Mt 25:40)

He vorsache Natalanche porbe somoiar sogllea mon’xam lagim, bhov korun,  ami ragan asanv tanche lagim, ami uloinam tanche kodde, ami porva korinanv ani ami visor ghatla tanche kodde bhavponnachea ekcharan jieunk Povitr Atmeachea adharan proitin korum-ia.

Post a comment