No comments yet

Kallzache Bore Ul’las….

Dis soron mhoine gele ani mhoine mezta mhullear chear vorsam dhavun gel’lim. Chintunk gelear kaluch he figorjent ailolo koso dista. Hea chear vorsanim Devachi kitlim boreponnam hanvem onbhovlim tim mezunk legun zainant. Dev kitlo boro tacho maiemog mitmer naslolo. Devachea adharan he figorjent vavr korunk bispachea utrak hoi mhunnun chear vorsam fattim hanv bhitor sorlo. Padr Raul he figorjecho padrvigar koso aslo, maiemogan ek voros tachea sangata vavurlo. Sadheponnacho tacho vavr punn kallzachea gunnanim bhoron lokachi seva kortanam hanvem taka pollelo ani khas onnbhovlo. He figorjent lokachi seva korunk zaito pattimbo tannim mhaka dilo. Ekuch voros padr Raul mhaka mell’lo.

Fattlim tin vorsam Padr Emidio vangdda he figorjent vavrunk soeg mhaka mell’lo. Khatrecho mhunn mhojer visvas dhovrun figorjecheo zaiteoch zobabdari mhojea hatant tannim ghatleo. He figorjent ami dogui bhav-bhav koxe vavurle. Mhozo padriponnacho onnbhov lhan punn tacho onnbhov kitleach vorsacho astanam legun amche modhem kosloch goir somoz naslo. Tachea adharan zaiteo vostu he figorjent korunk mhaka sopeponn zalem. Jezucho vavr to punn dogainim khandd marun hea tin vorsanim ami kelo. Devachea utracho mog mhojea kallzant tacheach asnnean ani bore bhudintleant vaddlo oxem mhaka dista. Magnnea vatten dhor bhudvarak ek soeg mellun mhojich vadd zali. Sodanch Padr vigaran sogllea vattanim mhaka adhar dilo. Devachem boreponn eka padri bhavachea rupan hanvem onnbhovlo.

Hea Ganvcho lok ekdom mogall zaitea boreponnan to borlolo. Vhoddlem Goy itihasachea pustokar zaiteach bhasanim tem porzollta. Amcho lokui aiz sonvsarbhor xipoddla, odhik korun Englandak aplea udharposonak lagun halichea kallar chodd gela. Hea chear vorsanim sogllea ganvchea lokacho mog utratlean ani aple kornnetlean favo zalo. Zanttim , bhurgim , tornattim soglleanim borem utor diun mog moipas mhaka dilo.

Amche figorjent zaiteo sonsta asat soglleanim sodanch figorjecho vavr mhukar vhorunk aplo pattimbo dilo. Ek-ek sonsta aple bhaxen vegvegllo vavr korta. Soglloch vavr mollacho. Hea passot konncheach nanv ghenastanam sogllea sonvstacho onnbhov boro mell’lo mhunn Devak argham dita. Gel’lea mhoinneachea uleacher zaiteanim aplim bhavnam udgarleant, tim vachun kalliz khub khuxal zal’lem ani toxench tumchem borem utor vachun kallzak daddoskai bhogli. Ekek sonstecho ani ekek vaddeacho ho onnbhov mhakach odhik vaddunk ek adhar.

Hea chear vorsanim khub onnbhov favo zala, to mhojea kallzant dhorun Padriponnachi fuddlim pavlam martanam sodanch ugddasacho urtolo. Monxea khatir monxea modlo vichun kaddlolo hanv, mhonntoch oskotaiek sabar pautti sampoddla ani tumi mhaka khub manun ghetla. Mhoje vatten goddie konnachem kalliz hanvem dhukoilam zalear koslench vaitt dhorinastanam mafi magtam. Hea ganvcho mog mhojea kallzant sodanch urtolo tea passot bore ul’las kallzant dhorun fuddle figorjent paul martam ani tumchea magnneanim mhaka dhovorcho mhunn vinoti korta. Toxench novea padrkurak tumi mogan gheuncho ani takai pattimbo diuncho mhunn mhojim magnnim. Soglleank tumkam mhozo mogacho Adeus!

Post a comment