No comments yet

Povitr Atmeachem Devosanv

Mogacheamno, ami sogllim Devachem nanv ani Jezuchem dusrem nanv zannanv. Devachem nanv zaun asa Yahweh mhollear, “Hanv Asam” ani Jezuchem dusrem nanv zaun asa Immanuel, mhollear, “Amchea Sangata Dev”. Donui nanvam amkam kolloitat  ki amcho Triek Dev, Holy-Trinity, sogllea vellar sogllea zageancher amchea borobor jieta ani  jim konn mogan jietat tanchea kallzant To jieta. Xim ani mer nastanam amcho Rochnar ani Sambhallnnar Dev amcho mog korta, amcho usko dhorta, amkam rakhta, samball’tta ani amchim magnnim aikun amkam magta tem dita ani amchea bhavartak lagun amchea jivitant ojapam ani vizmitam korta.  Korintkarank boroun  Bhagevont Paulu mhunntta: “Tumi Devachem mondir ani Devacho Atmo tumche sovem tthikann korun  asa mhunn tumkam khobor nam? Zor konnui Devachea mondirachem nisontton kortit, tor Dev tancho nas kortolo; kiteak Devachem mondir Povitr, ani tumich hem mondir!” (1Kor 3: 16-17).

Aplea Povitr Atmea udexim Bap ani Put amchea bhitor jietat ani ami khorim Bapachim bhurgim ani Jezuchim khorim bhav bhoinni koxim jieunk toch Atmo amkam khurpa, bholl ani adhar dita. Bhag. Paulu mhonntta: Povitr Atmeache suchovnne pormonnem jietat tim khorim Devachim bhurgim(Rom 8:14). Povitr Atmeachea adhara bhair Jezuche xikovnne pormonnem jieunk amkam ekdom avgodd (difficult). Jezu mhonntta: “Tumchea dusmanacho mog  korat, tumkam zolltat tankam borem korat, tumcher xirap ghaltat tankam axirvad diat, tumkam vaitt kortat tanche pasot magat, tumchea dusmanank borem korat – he toren jielear Bhov Vortea Devachim bhurgim tumi zatoleat” (Lk 6:27-28.35). Ekuch pavtti peleak bhogsunk amkam monxank ekdom  kottin ani Jezuche xikovnne pormonnem jieunk konnam lagim zatolem? Jim konn Povitr Atmeachem devosanv kortat ani tache suchovnne (inspiration) pormonnem jietat, tanche lagim he toren jieunk ani khorim Bapachim bhurgim zaunk ghoddttelench.

Ek khoro Jezucho xis zaun asa ek monis zo Povitr Atmeachea jive soirigotin jieta, khoro xis Povitr Atmo suchoita  te bhaxen Jezuchea utra pormonnem mogan cholta, zaitim borim follam dita ani Maim Marie ani soglleam bhogtam bhaxen, disa dispottim Bapachi khoxi pallta ani Jivont Jezucho govai zata.

Povitr Atmeachem devosanv korop, mhonllear, Ho Devacho Atmo amche bhitor asa mhunn ani ami Tachem jivem mondir mhunn sotmanunk zai ani Tachea asnneache zagrutaien (awareness of His presence within us) jieunk zai ani Tache lagim ek jivall soirigot sthapunk zai ani Tache lagim sogllea vellar ek “dialogue” korunk zai ani amkam To uzvaddachi  vatt dakoita tea pormonnem ami pavlam marunk zai ani Bapachi khoxi korunk zai ani sogllea vellar jivea Triek Devak vakhann’nnunk zai. He toren  jieunk ani khorea Devachim apurbaiechim bhurgim zaunk ami vavrum-ia.

Post a comment