No comments yet

Povitr Atmo – Ami Devachi porza koxi jieunk ek adhar

Sonvsar rochche adim Devan amkam vinchun kaddllim ani kall bhortoch amche avoi-bapai udexim amkam zolmak haddlim ani monis zal’lea aplea Sobda, Jezu udexim amkam aplim apnnailolim bhurgim kelim (cfr Eph 1: 4). Povitr Snana disa thaun amkam vinchun kaddlelem kull, rayall iadniki kull, sonvskarlelem raxttr, aplim ojapam vakhannche khatir Devan amkam apli khaxa porza keli (1 Pet 2: 9). Devan amkam, aple porjek, ek kherit bhaxechi zat kelea. Amche bhitor Devponn ani mon’xaponn misoll zaleant ani ek zaleant – We are a new brand species of mankind, where humanity and divinity are mingled. Ami vinchun kaddleli Devachi porza koxi jieunk amkam ek adhar dila. To mhollear Povitr Atmo: Povitr Atmo Bapacho ani Putacho Atmo, Bapachi ani Putachi podvi, zannvai ani boll. Povitr Atmo zaun asa Dev. To amche bhitor jieta – ami Tachem mondir, ghor. Tache suchovnne ani adhara bhair Devachea jivit- ditlelea Utra pormonnem mogan, ekcharan, eka-mekak somzun, bhogsun ani usko dhorun, xirapteleancher axirvad ghalun, dumallo ditelea pasot magun, amchea rogatchim nhoim tankam amchinch zalelea bhaxen vagounk, mhonllear, khorea Kristanvponnan jieunk, amkam ekdom avgodd. Chodd-xi Kristi porjek Povitr Atmeachi ollokh unnem asa, dekhun Tachea asnneachi zagrutai amkam unnem asa; tea pasot Jezun dhakoilelea Kristanvponnache khore vatten jieunk amkam ekdom avgodd zata. Ami, vinchun kaddlele Devache porjen, fokot Jezuk rigun ravlear, amchean borim follam, mogachea ani ekcharachea jivita udexim, ami diunk pavteleanv (cfr Jn 15:5).

Ami Devache porjen sonvsarachea nemam pormonnem nhoim punn xubhvortomanchea nemam pormonnem jieunk Dev amkam apoita (Rom 12:2). Chodd-xi Kristi porza sonvsarachea nemam pormonnem apleaponnan, axen, apsvartan, vhoddponan, dusreanchi beporva korun Kristak vell dinastanam jieta.  Povitr Atmeachea adharan ami novean zolmun novi rochna zaunk ani nitin, sotan, promannikponnan, ekcharan jieun pritumechem mitt ani sonvsaracho uzvadd zaun Jezu udexim Bapan amkam apoileant. Snan Datara Bhagevont  Juvanva bhaxen Jezuchi vatt dusreanchea jivitant toyar korunk amkam apovnnem dila. Povitr Atmeache suchovnnen he kam kortanam amchea jivitant tras eiit zalear bhienakant mhunn amchea Somian  amkam aplea asnneache asvasonn dila. “Sonvsar soro porian Hanv tumchea sangata asa”(Mt 28:20). Jeremias Provadea udexim-i Devan ho nirop dila: Punn Tum, Sorvespora, eka bollvont vira sarko mhoje kuxik ubo asai; mhojer add asat te adllon poddtole ani harovtole (Jer 20:11).

Mogacheamno Devan amkam apli porza kelea ani To amchea sangata sodanch asa, amchea ekcharan To jieunk sodtta; zo konn mogan jieta to Tachea ekcharan jieta. Ami Tachea bhurgeanim tambonastana Taka vakhannum-ia ani novean zolmun prithumeche mitt ani sonvsaracho uzvadd zaun  Jezuchi vatt amchea  ani dusreanchea  jivitant toyar korunk vavrum-ia.

Post a comment