Dev Apovnnem- Triek Devak Porgottunk Apoita

Dev Apovnnem, Padri-madri zaumchem, Devachem vhodd dennem. Dev apleak zai tankam ani apleak zai tednam vichun kadtam. Adlea Korarant Dev Abram, Moises, Saul, David, Samuel, Izaias, Ezekiel ani sobor zannank aple mogache porje sovem asunk, tankam vatt dakhounk, apli ollokh  diunk vichun kaddta. Novea Korarant, Jezu, Devacho Put, apleak dil’lem karia, Bapacho mog ani Bapachi ollokh porjek favo korta. Sorv xevttim, monxache soddvonne pasot aplench bolidan khursar korta. Hea sonvsarant jietanam, aplea vaurant, Jezu aplea 12 Apostlank vichun kadta ani tin vorsam aple borobor dovrun  tanchi akarnni korta.Triek Devachi, Bapachi, Putachi ani Povitr Atmeachi ollokh ani onbhov porgottunk, Jezuche xis, Jezu punorjivont zale uprant  pois-pois xipdot vetat. Triek Devak govai ditat, koxtt-moronn pasunn sonstat.

Aichea kallar, Triek Devacho mog ollokh ani onbhov porgottunk Dev kai zannak aplem kherit apovnnem dita ani Padri-madri amkam favo zatat. Dev-apovnnim ghorabeant amkam favo zatat, dekhun amchea ghorambeamnim hem Dev apovnneamchem bim kirllunk adar diunk magum-ia. Ami Padri-madrinim, bhurgeank bori dekh zaunk ani avoi-bapainim aplea bhurgeank Dev apovnneamchem paul marunk adar diunk magum-ia. Amchea Kristi kutumbamnim, bhurgim unni (less) asant. Ghoreabeant ek vo don bhurgim asant hea pasot zaiti zann padre-madri zaumchem paul pattim dovortat. Amchea Kristi ghoreabeamnim Devache khuxe  pormonnem bhurgim asunk magum-ia. Padre-madri zaunk aplem apovnnem xiktat tankam amcho magnneacho adar magum-ia.Tor him kai chitnam amchea monant dovrun, amche firgojent Dev-apovnnim favo zaunk magum-ia.

Fr. Socoro Colaco

Asst. Parish Priest