Kristanvponn

Kristanvponn mhollear Jezu Kristacher sotmandtelim bhav-bhoinnim  jim apleak dilelea ani aple bhitor jietelea Devachea Povitr Atmeachea suchovnnen eka kallzachim ani eka monachim zaum bhavponnachea ekcharan jietat.

Tim Devan vinchun kaddloli porza ani Devachea kuttumbantlim; khol ekvottan, bhavponnan, eka-mekacho usko dhorun ani eka-mekak bhogsun, somzun, man diun amchem Kristi jivit jieunk Devan amkam vinchun kaddleant. Apunn morche adim Jezun Bapak ek prarthon kelem: “ Tim sogllim ek zaum, zoxem tim, Bapa, Mhoje sovem asat ani Hanv Tuje sovem asam, Toxench tim amche sovem ek zaum, zoxem ami ek toxim him ek zaunche khatir, Tuvem Mhaka dilea ti Mhoima Hanvem tankam dilea,

Jezuche Povitr Sobhent ani tachea xisam modhem ekvott ghoddon ieunk sat gunnanchi goroz asa (Jn 17:21-22)”Amche Povitr Sobhent ontorraxttrik, raxttrik, dor ek diocezint, dhor ek firgojent, somudaient, dhor ek Kristi Sonstent ani zomeant ani khatteant ekvott ghoddun haddunk ekdom ghorjechem poilem pavl mhollear dhor ek Kristi vangddean ani sogleamnim Jezuchem jivit amchea jivitantlean jieunk. Oxem korunk sat gunnanchim goroz:

1. Hurba: Ho kherit gunn Jezucho: Aplea Atmea udexim Jezu aplea xisank, otmean ek zaunk ani povitr sobhechea vavrant misoll zaunk, hurba, gottai, boll dita. Jezuk naka aplea xisam modhem gunngunnop uchambollai ani vad-vivad aslole. Niraxi ani uchamboll zaleleank Jezucho Atmo dhir bholl, hurba ani gottai dita. Apleam xisank-ui hech toren jieunk Jezu apoita.
2. Mog: Dhor eka xisak dusream xisam lagim ekvott samballunk Jezucho Mog uskaita. Jezuchea mogak Agape-mog mhonnttat: Agape mog (love) mhonllear suarti ani teagi mog. Agape mog (love) mhollear ek mog zo favo nhoim tancho pasun mog korta. Agape mog – Jezucho mog, zo mog Jezun aplich bhett amche pasot kursar korun Bapak dakoilo.

Dhor eka Kristanvan oslo mog aplea jivitantlean vaum-so kelo zalear  ten’na ki khoreponnim eke firgojent vo zomeant khoro ekvott astolo.

3. Povitr Atmo- Holy Spirit: Je goddier ami Jezuk amcho ekloch Dhoni-Dev mhunn manun ghetanv te ghoddier Povitr Atmo amche bhitor sorta, amkam hurba, dhir-boll dita  ani amkam Jezuche govai zaunk gottai dita.

Povitr Atmo Kristi porje modhem ek mon ani ek kalliz ghoddun haddta.

4. Doia– Compassion: Jezuchem kheritponn, doia : Amkam doia favo korunk To sorgar thaun denvlo. Ami Taka nakarlear pasun amkam vaittantle bhair kaddunk Jezu amche pattlean asa. Niraxeank, eksureank, dukhovleleank, khontovtoleank, sanddleleank, sonkoxttant asleleank amche udexim Apli doia sodanch pavounk Jezu amkam sodanch apoita. Tednam zaitim zannam amche somudaient bhitor sortolim.

5. Khuxalkai –Joy : dhor ek Povitr Sobhecho vangddi ekamekache khuxalkaie pasot uskean bhorlolo zaunk Tenna te sobhent ekvott astoloch.

6. Khaltikai: Jezu kalti zalo titlo khoimcho-i monis khalti zaunk nam. Povitr Sobheche ani sonvsarache proxnn suttave zatole zalear ami, Krista bhaxen, khalti zaunk zai. Eke Povitr Sobhechim vangddim khaltikaien jielear ani choll’lear te sobhent vo sonstent vo somudaiant ekvott astolo. Dhor eka Jezuchea xisan Jezuche khaltikaien aplem Kristi jivit jieunk zai. Khaltikaien jieta to aplem dan-mon apleacheruch dovrinam punn Jezucher ani tachea kamacher, mhonllear, porjechi seva korunk ani Tachem utor sogllea sonvsarak pavounk. Hem kam kortanam dhor ek xisan vavrunk zai, usko dakounk zai: sanddleleank, eksureank, patkeank, niraxeank, bhukeleank, ghor-dhar nasleleank. Every believer is needed to reach out to the lost and lonely, the shut-ins and helpless, the hungry and cold, the sinful and doomed of his community, cities, country and world. Dhor eka Jezuchea xisan aplench chintchem nhoi bogor dusreanchem.  Tannem vochun bhett korunk zai, seva korunk zai, adhar diunk zai, jevunk ani nesunk diunk zai, dusreank aikunk ani budh diunk zai, etc.

Mogachea bhava-bhoinnino Jezuchem jivit amchea jivitantlean jieunk he vhoir dil’le Jezuche gunn amche korunk ami vavrum-ia.

Ami dogui he firgojentle gonvlli amchea askareachi, Bhag. Andrechi, khuxalkaiechi porob tumkam soglleank anvddetanv.